Link açıqlığı

Rusiye arbiy ve nezaret organlarınıñ temsilcileri işğal etilgen Qırımda 2014 senesi dekabr 4-te qırımtatar iş adamı Sadıh Tabahqa ait olğan «Winta» pencereler şirketini teşkerdiler.

Bunı Qırım.Aqiqat saytına şirketke alâqası olğan qaynaq bildirdi.

Onıñ malümatına köre, Qırım prokuraturası, FSB, MÇS ve Federal migratsion hızmeti teşkerüvni beraber keçirdiler. Em de, berilgen malümatqa köre, bu teşkerüv soñki üç ay içinde birinci degil.

Adını gizli qaldırmaq muracaatınen malümat bergen adamnıñ aytqanına köre, işbu teşkerüvler Aqmescit regional meclisi yerleşken qomşu binanıñ resmiy şekilde iş adamına ait olğanınen bağlı ola bile.

Bu sene sentâbr ayında qapatılğan merkeziy Meclis binasında «Avdet» qırımtatar gazetasınıñ muarririyeti yerleşe.

Keçenleri bu binada yañı meydanğa ketirilgen «Qırımtatarlarnıñ aqlarını qoruv komitetiniñ «matbuat konferentsiyası olıp keçti.

Sentâbr 16 künü 2014 senesi Meclis binasında rusiyeli qoruyıcı organlarnıñ vekilleri tintüv ötkerdiler. Vesiqa, USB-fleş aletleri, islam mevzusında edebiyat, bilgisayarlar, Ukraina halq vekili Mustafa Cemilevniñ şahsiy şeyleri tahliye etildi.

Sentâbr 17-de Meclis binasında «Qırım» Fondu» Hayriye Teşkilâtınıñ reisi Riza Şevkiyevge mahkeme qararını seslendirdiler. Bundan soñ «Qırım» Fonduna» ait olğan binanı qapatmaq qararları aqqında bildirdiler. Bundan sebep Qırımtatar Milliy Meclisiniñ vekilleri binanı terk etmege mecbur ediler.

Sentâbr 19-da Qırımtatar Milliy Meclisiniñ temsilcileri binanı terk etip, onı müürlemege mecbur oldılar.

Birleşken Milletler Teşkilâtınıñ Ukrainada insan aq-uquqlarına riayet etüv aqqında soñki maruzasında Qırımdaki vaziyet, şu cümleden qırımtatar halqı vekillerine nisbeten basqı qayd etile.

BMT İnsan aqları boyunca idare Qırım akimiyeti ve Rusiye akimiyetine qırımtatarlarğa qarşı basqı, qorquzuv areketlerini toqtatmağa ve yarımadanıñ er bir sakinine esas aqlarını kefil etmege çağıra.

XS
SM
MD
LG