Amerika Qoşma Ştatlarınıñ devlet kâtibi John Kerry Baseldeki OSCE Tışqı işler nazirler körüşüvinde çıqışta bulunıp, Rusiyeni Ukrainada vaziyetni barışıq yollarnen al etmek içün areket etmege çağırdı. Bunı o körüşüv iştirakçilerine cumaaqşamı künü, dekabr 4-te, bildirdi, – dep haber ete Ukrinform.
«Qoşma Ştatlar ve Ukraina mustaqilligi ve aqlarına qoltutqan memleketler çatışma olmasını istemey. Rusiyeniñ kendi areketlerinden sebep çette qalması bizim maqsadımız ya da arzumız degil», – dep qayd etti Amerika Devlet departamentiniñ yolbaşçısı.
O, Rusiye eyyeti bulunğan toplaşuvda bildirdi ki, Moskva «kergin vaziyetni tınçlandırsa», eski itibar ve munasebetlerni ğayrıdan tikleycek.
Kerryniñ aytqanına köre, «bir kimse bu zıddiyetniñ faydasını körmeycek».
AQŞ devlet kâtibi Avropada telükesizlik ve işbirligi teşkilâtına muracaatta bulunıp, telükesizlikni temin etmek içün «ayrı devlet azalar tarafından talaplarğa uymağanlarını» aytmaq kerek. Onıñ qayd etkenine köre, OSCE bütün halqara oyuncıları mezkür hatalardan sebep zarar köre.
