Ukraina prezidenti Petro Poroşenko dekabr 6-da qayd etilgen Ukraina Silâlı Quvetler Künü arfesinde arbiyler ile körüşip, Donbass meselesini muzakere etti.
Bunı cumaaqşamı künü, dekabr 4-te, Ukraina prezidentiniñ memuriyeti Twitterde bildirdi.
Körüşüv iştirakçileri ATO yerlerinde qoyulğan vazifelerniñ ömürge keçirilmesini muzakere ettiler. Malüm ki, olar dekabr 9-da başlaycaq Tınçlıq künü aqqında tizilgen Minsk añlaşmalarına riayet etilmesini temin etmeli.
Toplaşuvda boyevikler Minsk añlaşmalarını bozsa, yapılacaq areketler baqıldı.
Devlet yolbaşçısı Silâlı Quvetlerge cenk tehnikasını berüv ve esir alınğanlarnı azat etüv meselelerine ayrı diqqat ayırdı.
Körüşüvde Mudafaa naziri Stepan Poltorak, İçki işler naziri Arsen Avakov, Ukraina Havfsızlıq Hızmetiniñ reisi Valentin Nalivayçenko, Devlet sıñır hızmetiniñ reisi Viktor Nazarenko, Milliy gvardiya komandanınıñ muavini Nikolay Balan iştirak ettiler.
