Ukraina Silâlı Quvetleriniñ Baş ştabı Rusiye işğal etilgen Qırımda «İskander» raketalarını yerleştirgenini tasdiqladı.
Bunı dekabr 4 künü, Kiyevde brifing devamında, Ukraina Silâlı Quvetleriniñ Baş ştabı temsilcisi general-mayor Oleksandr Rozmaznin bildirdi.
«Rusiye Federatsiyasınıñ silâlanmasında «İskander» raketa tertibatı olğanı kerçektir. Ve o şimdi vaqtınca işğal etilgen Qırım toprağındadır. Bir vaqıtları «Toçka» tertibatını deñiştirgen komplekstir. Birincisinde bir raketa edi, mında ise eki»,– dedi o.
Rozmaznin aytqanı kibi, kompleks areketiniñ uzaqlığı – 500 km.
«İşimiz fena olğanını ayta bilem, çünki raketa kompleksleri öz raketalarında muayyen özek yüklerini taşıy bile. Şunıñ içün «İskander»niñ olğanı nasıldır bir telüke olacağını belgiley», – dedi Rozmaznin.
Evel Ukraina Devlet Sıñır hızmeti ve SNBO Rusiyeniñ Qırımda Silâlı Quvetleri küçleriniñ artmasını bildirgen edi.
2014 senesi fevralniñ soñunda, martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
