Ğayıp olğan qımtatarlarnıñ qıdıruvı boyunca «Nazirler şurası» yanındaki taqım artıq körüşmey.
Bunı İnsan aqları boyunca Qırım alan missiyası bildire.
Uquq qoruyıcılarınıñ aytqanına köre, evel taqımnıñ toplaşuvı noyabr 25 künü keçirilmek kerek edi.
«Bunıñ ile, akimiyet oragnaları tarafından 31.10.14 tarihına qadar berilmesi kerek olğan qıdıruv esabatı alâ daa aşkâr etilmedi», – dep bildire Qırım alan missiyası.
Qırım «Nazirler şurası» yanında ğayıp olğan qırımtatarlarnıñ işleri ile oğraşacaq taqım peyda oldı. Taqımnıñ birinci toplaşuvı endi keçti, neticede işbu insanlarnıñ işleri Qırım boyunca Rusiye Taqiqat komitetiniñ Baş taqiqat idaresininiñ Emieytli işlerniñ taqiqatı boyunca İdaresine berildi.
Sentâbr 27 künü, saat 19:00, Qarasuvbazarnıñ civarında yerleşken Sarı-Su mikrorayonında belgisiz şahıslar eki qırımtatar gençini avtobusqa taşlap, belgisiz yönelişke alıp kettiler.
Oktâbr 1 künü gençlerniñ ana-babaları ile körüşkende, Qırım «başı» Sergey Aksönov qıdıruvnıñ keñişlevi içün añılğan taqımnıñ teşkil etilecegini bildirdi.
İnsan aqları boyunca Qırım alan missiyası Rusiye tarafından Qırım işğal etilgeninden sebep yarımadada mart 5 künü çalışmağa başladı.
