Link açıqlığı

Saatnıñ esas haberi

Rusiyede «istilâcı memleketlerge» qarşı qoruv tedbirleri aqqında qanun leyhası peyda oldı


Rusiye Devlet Dumasında «istilâcı memleket» ibareni añlatqan qanun leyhası kirsetildi. Böylece, Rusiye, onıñ vatandaşları ve yuridik şahıslarını cezalağan devletler yuqarıdaki ibarenen ifadelenecek, – dep haber ete TASS.

Teşebbüs müellifleri Yedinaya Rossiya azaları Yevgeniy Fedorov ve Anton Romanov, em de LDPR fraktsiyasınıñ deputatı Sergey Katasonov oldılar.

Vesiqağa binaen, «istilâcı memlekette» qayd etilgen yuridik ve fizik şahıslar, em de bunıñ kibi çetel şahılar ile alâqası olğan rusiyeli yuridik şahıslarğa Rusiyede audit, yuridik ve diger tevsiye hızmet faaliyetlerinen oğraşmağa yasaq etile.

Bunıñ kibi cedvelni tizmek vazifesi ükümetke qalacaq. «Ceza kirsetilgen künden itibaren otuz kün devamında» cedvel tizilmeli. Nazirler Şurası Rusiyede yapılması yasaq etilgen diger faaliyetlerni de belgilemek kerek.

Neşirniñ malümatına köre, qanun leyhası iyül ayında azır edi, lâkin kirsetüvni dekabr ayına qaldırğan ediler. Devlet dumasınıñ anayasa qanunları ve devlet qurucılığı komiteti işbu ğayeni neticesiz dep adladılar.

XS
SM
MD
LG