İşğal etilgen Qırımda suv temini meselesinen oğraşmağa devam eteler. Rusiye tabiat resursları ve ekologiya naziri Sergey Donskoy Qırımnıñ öz başına ilân etilgen baş naziri Sergey Aksönovğa bergen malümatına köre, yarımadada 16 araçıq burğunen teşile ve 5 araçıq tamir etile, İçki rayonında gidroqavuşaq qurula.
Bunı dekabr 2-de TASS Rusiye agentligi bildire.
Rusiye tabiat resursları nazirliginiñ planına köre, 20 mesken yer içün araştırma işletüv araçıqları burğunen teşilmeli.
«Qırım sakinlerine içilecek suvnen temin etüv meselesi yaqın yılları al etilecek», – dep tekrarlay Donskoynıñ aytqanlarını onıñ matbuat hızmeti.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
