Daa bir Rusiye turistik şirketi müşterilerge hızmet etip olamağanını bildirdi. Bu – 20 yıldan berli Novosibirskte çalışqan «Akris» şirketi, dep haber ete Azatlıq Radiosı.
Şirket müdiri Vladimir Kourovnıñ aytqanına köre, bunıñ esas sebebi iqtisadiy vaziyet ve rubl fiyatınıñ ucuzlaşması oldı. Novosibirskte 250 dollarğa seferni satın ala bilesiñ, lâkin ava seferiniñ bilet maliyeti 650 dollarnı teşkil ete, dep añlattı «Akris» şirketiniñ müdiri.
Onıñ malümatına köre, al-azırda şirketniñ 164 müşterisi çetelde tatilde buluna.
2014 senesi yazda bir qaç Rusiye turistik şirketi faaliyetini toqtatqan edi. Birinci olaraq bu saada eñ tercribeli olğanlardan biri «Neva» şirketi işini toqtattı. Ondan soñra «Roza vetrov Mir», «Ekspo-tur», «Labirint», «İntAer» , «Solveks-Turne», «Yujnıy Krest», «Versa» şirketleri qapatıldı.
Rusiyeniñ Taqiqat komiteti Rusiye turistik şirketlerine qarşı qanunsız maliye areketleri sebebinden bir qaç cinaiy iş açtı.
