Ukraina Yuqarı Radası salı künü, dekabr 2-de, Stepan Poltoraknı Ukraina mudafaa naziri vazifesine tayinledi. Buña 347 halq deputatı qol tuttı, – dep haber ete UNİAN.
Ukraina Anayasasına binaen, Stepan Poltoraknıñ namzetini bu vazifege Ukraina prezidenti Petro Poroşenko teklif etti.
Neşirniñ bildirgenine köre, Stepan Poltorak 1965 senesi fevral 11-de Odessa vilâyetiniñ Tarutinskiy rayonınıñ Veselaya köyünde dünyağa keldi. Sovetler Birliginiñ MVD Orconikidze aliy arbiy komandanlıq oquv yurtını, Ukraina Silâlı quvetleriniñ arbiy akademiyasını bitirdi. 1983 senesinden itibaren askerlikte bulundı.
Ukraina içki işler nazirligi içki quvetleriniñ arbiy ve mahsus azırlıq yolbaşçısı vazifesinden 2002 senesi mart ayında Ukraina içki işler nazirliginiñ içki ordu akademiyasınıñ yolbaşçısı vazifesine tayin etildi. 2014 senesi fevral 28-de prezident emrinen İçki işler naziriniñ içki ordular komandanı olaraq tayinlendi.
2014 senesi aprel 15-te Yuqarı Rada Poltoraknı Ukraina Milliy gvardiyasınıñ komandanı vazifesine tayin etti. 2014 senesi avgust 23-te oña general-polkovnik rutbesi berildi. 2014 senesi oktâbr 14-te Yuqarı Rada Poltoraknı mudafaa naziri vazifesine tayinledi, buña 245 deputat qol tuttı. 2014 senesi oktâbr 27-den itibaren – RNBO azası.
Salı künü, dekabr 2-de, Ukraina Yuqarı Radası Pavlo Klimkinni tışqı işler naziri vazifesine tayin etti. Sessiya zalında qayd etilgen 383 halq deputatından 351 kişi qol tuttı.
