Qırım.Aqiqat saytı YouTube ağında kendi kanalını qayd etti. Endiden soñ sayt oquyıcıları kanalğa abune olıp, işğal etilgen Qırım ve qıtaiy Ukrainağa köçip ketken qırımlılarnıñ yaşayışı aqqında video haberlerini ala bileler.
YouTube kanalında sayt mühbirleriniñ levhaları, ekspertlerniñ izaatları ve video levhaları yerleştirilecek.
«Qırım.Aqiqat saytı – adise-vaqialar yerinden Qırım kerçegi: meraqlı haber, fotoresim, video ve bloglar», – dep aytıla saytnıñ kanalında.
Kanal bir qaç kün evelsi qayd etilgenine baqmadan, seyircilerniñ sayısı yüzlerni teşkil ete. Dekabr 1-de qoyulğan «Qırımtatarlarnıñ Putinge qoltutuv mitingi» videosını tahminen 1000 kişi baqtı.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
