Ukraina Nazirler Kabineti işğal olunğan yarımadanı terk etken qırımtatarlarnıñ aqlarını yañı avaleler ile sıñırlap, olarnı horlay.
Bunı Kiyevde keçirilgen matbuat konferentsiyası devamında Yevromaydan-Qırım areketiniñ idarecisi Andriy Şçekun, mecburen köçip kelgenler içün içtimaiy ödemeleriniñ yañı şartlarını izaatlap bildirdi, dep haber ete Qırım.Aqiqat mühbiri.
«Cemiyetniñ ğayreti sayesinde köçip kelgen şahıslar aqqında qanun qabul etildi. Oña köre, akimiyet köçip kelgenlerge yardım leyhalarını çıqarmalı. Amma bunıñ yerinde biz işbu qanunnı sıñırlağan diger avaleni köremiz. Mında aytılğanı kibi, dekabr 31 kününe qadar qayd olunmağanlar belgilengen para yardımından marum qalacaqtır. Bu ne demek? Eger de insanlar yanvar 17 künü çıqsalar? Yani, olarnıñ destek aqları olmazmı? Bugün devlet akimiyeti, ükümet ve şahsen Arseniy Petrovıç (Yatsenük – muar.), bu avalelerge imza qoyıp, qırımlılarnı horlay», – dey Şçekun.
Ukraina Nazirler Kabineti № 637 avalesi ile Qırım ve Donbasstan köçip kelgenlerni nefaqa, stipendiya ve diger ödemelerniñ tölenilmesi boyunca yañı şartlarnı belgileyler. Eger de qırımlılar dekabr 31-ne qadar qayd etilmese, devletten maliyeviy yardımdan marum qalır.
