Qırımda musulmanlarnıñ vaziyeti Donetsk ve Lugansk vilâyetleriniñ işğal etilgen territoriyalarında olğanına köre, daa da beter.
Bunı BTB telekanalınıñ efirinde «UMMA» Ukraina musulmanlarınıñ diniy idaresi müftisi Said İsmagilov bildirdi.
«Biz Ukraina musulmanları aqqında aytacaq olsaq, şimdi Qırımda musulmanlarnıñ vaziyeti Donetsk ve Lugansk vilâyetleriniñ işğal etilgen territoriyalarında olğanına köre, daa da beter olğanını qayd etmelimiz. Noyabr ayında Qırım köy camisini yaqtılar. Bu sene, işğalden soñ, bu kibi adise endi ekinci kere yüz berdi. Böyleliknen, Qırımda musulman diniy inşaatlarına planlaştırılğan ucümlerni köremiz», – dedi İsmagilov.
Onıñ sözlerine köre, işğal etilgen Qırım musulmanları taqipke oğraylar. Çeşit dinlerni kütken insanlarnıñ aqları bozulmaqta.
«Hristianlıq, yeudilik, islâm temsilcileri bildirgen fikirge köre – diniy aq, serbestliginiñ bozuluvı ep beterleşe eken. Ukraina musulmanları nasıldır bir hususiy vaziyetni temsil etmeyler Biz şimdi işğal etilgen territoriyada yüz bergen vaqialarnı yaşaymız», – dedi İsmagilov.
Müftiy yarımadanıñ işğalinden soñ sıq rastkelgen qırımtatarlarnıñ gayıp oluvını da qayd etti.
«Ep devam etken bir şeyge rastkeldik. Bu ne sebepten ola ve bunıñ artında kim tura kibi meselelerge qıymet kesmege şimdi qıyın. Amma bu al halqnı qorquza, bu kibi zorbalıq – qorquzuv vastasıdır. Razı olmağanlarnıñ qorquzuvıdır», – dedi o.
Evel Human Rights Watch işğal etilgen Qırımda insanlarnıñ ğayıp oluvı boyunca öz qasevetini bildirgen edi. Soñki arizasında aytılğanı kibi, Qırımda Rusiye işgaline qarşı çıqqan insanlarnıñ, esasen qırımtatarlarnıñ ayırımı yüz bere.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
