Meclis muhalifleri «Qırım birligi» qırımtatar cemiyet teşkilâtı qırımtatarlarnıñ tertibatlarını Rusiye uquqiy alanında qanunlaştırmağa aşıqqanınıñ sebebi teşkilât yetekçileriniñ eyi niyetlerinde degil, dep tüşüne Qırımıtatar Milliy Meclis reisiniñ muavini Nariman Celâl.
Bunı o Qırım.Aqiqatqa bildirdi.
«Bu teşkilâtta olarnıñ aktualligi vaqıt ceetten sıñırlı olğanını añlaylar. Mında «vaqıtnıñ ketkenini» duyalar. Meclis de yerinde turmay, biz de dialog, akimiyet ile laf etmek kerekligi aqqında aytamız», – dedi o.
Celâlnıñ fikrine köre, «Qırım birligi» «Qırım» cemaat areketi kibi öz qararlarında mustaqil degil.
«Olarğa şimdi biri-birine raqip olmağa imkân bereler. Amma yaqın zamanda bu kerek olsa, olar oturıp birleşecekler», – dey Celâl.
«Qırım birligi» teşkilâtı bildirgeni kibi, onıñ teşebbüsi ile meydanğa ketirilgen qırımtatar halqınıñ cemaat şurası «qırımtatarlar tarafından ürmet qazanğan eken». Bu aqta Aqmescitte noyabr 30 künü keçirilgen cemiyet şurasınıñ toplaşuvında alınğan rezolütsiyasında aytıla.
«Qırım birligi» Qırım Rusiye tarafından işğal etilgeninden soñ teşkil etildi ve yarımadada olğan bütün qırımtatar cemiyet tertibatları içün bir merkez olmağa tırıştı.
Nezaretçilerniñ fikrine köre, bunı akimiyet muhalifi olğan Qırımtatar Milliy Meclisiniñ yerine bir teşkilâtnı meydanğa ketirmek içün ettiler.
