Rusiye prezidenti Vlabimir Putin bazarertesi künü dekabr 1-de Türkiyege devlet ziyareti ile keldi. TASS bergen malümatqa köre, Ankarada onı Türkiye prezidenti Recep Tayip Erdoğan ile muzakereler bekley.
Neşirniñ qayd etkeni kibi, Putin ve Erdoğan İşbirlik Şurasınıñ beşinci toplaşuvını yüksek seviyede keçirecekler. Toplaşuvlar er sene, de Rusiye, de Türkiyede keçirile.
«Em strategiyanı, em eki memleket arasında munasebet inkişafını işlep çıqarğan ve siyasiy, ticariy-iqtisadiy, insaniy işbirliginiñ esas leyhalarını teşkil etken idareci bir organ», – dedi Rusiye prezidentiniñ yardımcısı Yuriy Uşakov.
Tahminlerge köre, Putin Ankarağa kelip, birinci nevbette Atatürk abidesine gülçemberni ketirir, yañı prezident sarayında resmiy qarşılav tedbirinde iştirak eter, muzakerelerden soñ ise Türkiye prezidenti Rusiye zenaatdaşını aqşam yemegine davet eter.
Putin ile Erdoğan subetleşkende, halqara suallerine ayırıca diqqat etmek kerekler. Uşakovnıñ fikrine köre, 2015 senesi «Rusiye ve Türkiye işbirligi – Avstraliyadan Türkiyege keçken «G-20» reisliginiñ nazarğa alınuvı ile pekitilecek».
Putinniñ ziyareti devamında on añlaşmanıñ qabul etilmesi planlaştırıla. Olarnıñ arasında – «Rosatom» ve Türkiye energetika ve tabiat resurslarınıñ naziriligi arasında atom ve yanadaş saalarında çalışacaq hadimlerniñ azırlavı boyunca memorandum.
Bunıñ ile Rusiye energetik agentligi ve Türkiye Energetik Nazirligi arasında energoeffektivlik saasında qarşılıqlı añlaşma aqqında memorandumnıñ imzalanuvı ola bilecek.
Bundan da ğayrı, vesiqalarnıñ arasına Rusiye İqtisadiy İnkişaf Nazirligi ve Türkiyeniñ küçük ve orta şirketleriniñ destegi boyunca devlet teşkilâtı arasında añlaşmanıñ qabul etilmesi közde tutıla.
Bunıñ ile Sberbank ve Türkiye baş naziri yanında yatırımlarnıñ celp etilmesi ve destegi boyunca Agentlik işbirlik aqqında añaşmalarnı qabul eter, Sberbank ise Türkiye sağlıq saqlav nazirligi ile niyetleri aqqında protokolnı imzalar.
Bundan da ğayrı, cinaiy işler boyunca qarşılıqlı uquqiy yardım aqqında rus-türk añlaşması, eki memleketniñ emek saasında işbirlik memorandumı imzalanılacaq.
Şu sırada, rus-türk ticariy-iqtisadiy işbirlik aqqında akimiyetlerara komissiyanıñ 13-nci toplaşuvından protokol imzalanuvğa azırlana.
Uşakov şunı da bildirdi ki, Ankaradaki toplaşuv neticesinde 2016 senesi Rusiye ve Türkiyede turizm senesi olaraq adlanılacaq. 2013 senesi Türkiyede 4,1 mln Rusiye vatandaşı raatlandı, 2014 senesi bu raqam 14% arttı. Keçken sene Rusiyede türk turistlerniñ sayısı 385 biñ insan edi.
Evel qayd etilgeni kibi, Türkiye akimiyeti Rusiye yolbaşçılığı ile Qırımğa qırımtatarlarnıñ liderleri Mustafa Cemilev ve Refat Çubarovnıñ kiriş yasağı aqqında söz yürütmek kerek edi.
Aprel ayında Mustafa Cemilevge Rusiye tarafından işğal etilgen Qırımğa kiriş 5 yılğa yasaq etildi. Bundan soñ aynı böyle yasaq Qırımtatar Milliy Meclis reisi Refat Çubarovğa seslendirildi.
