«Qırım birligi» cemaat teşkilâtınıñ reisi Seytumer Nimetullayev 2014 senesi noyabr 30-da Aqmescitte olıp keçken Cemaat şurasınıñ konferentsiyasını «2015 senesinde Qurultay keçirilmesi içün birinci adım» dep adladı.
Bunı Qırımtatar Milliy Meclisiniñ muhalifeti sayılğan cemaat teşkilâtınıñ reisi Qırım.Aqiqatqa ayttı.
«Bizler bütün rayonlarnı birleştirdik, er kes rey berdi, epimiz – yañı Qurultayğa baracaqmız ve qırımtatar halqı adından qarar alacaqmız, rezolütsiyalarnı qabul etecekmiz», – dedi Nimetullayev.
Onıñ fikirince, şimdiki Qırımtatar Milliy Qurultayı qanunsızdır, çünki «Ukraina terkibinde ve onıñ qanunları çerçivesinde saylanğan edi», ve, demek ki, Rusiye qanunlarına köre işine devam etip olamay.
«Qırım birligi» cemaat teşkilâtınıñ reisdeşi konferentsiyada seslendirgen malümatqa köre, tedbirge Qırımnıñ farqlı regionlarından 245 insan keldi.
Hatırlatamız, «Qırım birligi» cemaat teşkilâtı bildirdi ki, onıñ teşebbüsinen meydanğa ketirilgen cemaat şurası «qırımtatarlar tarafından tanıla ve olarnıñ itibarını qazandı». Bu aqqında bazar künü, noyabr 30-da, Aqmescitte cemaat şurasınıñ toplaşuvında qabul etilgen rezolütsiyada aytıla.
Aynı vaqıtta Meclis azası Eskender Bariyevniñ zanınca, Meclisniñ muhalifeti olğan «Qırım birligi» cemaat teşkilâtı keçirecek Qurultay qanunsız olacaq, çünki qırımtatarlarnıñ ekseriyeti onıñ neticelerini tanımaycaq.
«Qırım birligi» teşkilâtı Rusiyeniñ Qırım işğalinden soñ meydanğa ketirilip, yarımadada faaliyet köstergen bütün qırımtatar cemaat teşkilâtlarını birleştirecek bir merkez olacaq edi.
Közeticilerniñ fikirince, bu teşkilât Qırımtatar Milliy Meclisniñ alternativası olmaq maqsadında meydanğa ketirildi.
