İşğal etilgen Qırımda Federal migratsion hızmetiniñ yerli idarelerine hadimlerni işke qabul eteler. Matbuat hızmetiniñ malümatına köre, yarışta 75 namzet iştirak etti.
Qırımnıñ öz başına tayin etilgen akimitine yaqın olğan Krıminform saytı bildirgeni kibi, yarıştan keçip, öz bilgi seviyesini köstergenlerni Federal migratsion hızmetiniñ qırım idaresine qabul etilecekler.
«İdarede al-azırda hadimlerniñ meselesi – eñ müim meselelerden biri. Şimdi muracaat etkenlerniñ sayısı FMH territorial bölüklerniñ qabul etüv imkâniyetine kelişmey, şunıñ içün nevbetler peyda ola. İşbu vaziyetni tertipke ketirmek içün Rusiye FMH yolbaşçılığı Qırım idaresiniñ hadimler sayısını arttırmaq qarar aldı. Al-azırda müessise yañı hadimlerini celp ete»,– dep qayd etti FMH Qırım idaresiniñ yolbaşçısı Pötr Yaroş.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
