Link açıqlığı

Saatnıñ esas haberi

Cemilev: qırımtatarlar Rusiye teşviqatı ile küreşmek içün haber ağını teşkil etecekler


Qırımtatarlar yarımadada Rusiye teşviqatı ile küreşmek içün haber ağını teşkil etmek niyetindeler, dep haber etti qırımtatar milliy yetekçisi Mustafa Cemilev mecburen köçip kelgenler ile keçirilgen körüşüvde.

Bunı «Blok Petra Poroşenko» firqasınıñ matbuat hızmeti bildirdi.

Halq deputatınıñ sözlerine köre, şimdilik bu maqsatnı amelge keçirmek içün aqça yoq, çünki o reklamasız çalışıp, kârnı ketirmeycek. Şunıñ içün şimdi işniñ çeşit şekilleri baqıla.

Cemilevniñ sözlerine köre, bu ğayeni o, Prezident Petro Poroşenko ile muzakere etti eken.

«Prezident şimdi nasıldır bir kanal ile añlaşmağa mümkün olğanını ayttı, bizde bir taqım olsa, biz künde bir ya eki saat Qırımğa yayınlavnı alıp barır edik. Bu yönelişte şimdi çalışamız», – dedi qırımtatarlarnıñ lideri.

Bundan da ğayrı, Cemilevniñ aytqanı kibi, bu işke endi tecribeli jurnalistler celp etilecek eken.

«Jurnalistlerni paralı sürette celp etecekmiz, Qırım mevzusı ukrain ve dünya matbuat saifelerinden iç bir zaman yoq olmasın dep, yarımada boyunca tarqatılacaq yayınlavnı temin etmege tırışacaqmız», – dedi o.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG