Link açıqlığı

Qırımtatar halqınıñ aq-uquqlarınıñ qorçalavı boyunca komitet Qırımda aq bozuluvlarınıñ qayd etilmesi içün «yardım bağı»nı açtı.

Bunı qırımtatar milliy Meclis azası, Komitetniñ idarecilerinden biri Eskender Bariyev Aqmescitte keçirilgen konferentsiyada bildirdi, dep haber ete Qırım.Aqiqat mühbiri.

Onıñ sözlerine köre, bu kibi areketlerge qırımlılar gece-kündüz: +7 978 0559969, +7 978 0559979, +7 978 0559989 nomeraları boyunca şikâyet ete bileler.

«Bağlarnı anketanı tolduracaq operatorlar qabul etecek. Soñra bu anketalarğa köre aq bozuluvlarınıñ cedveli tizilecek», – dep añlattı Bariyev ve bağlar anonim sürette qabul etilecegini de qayd etti.

Komitet teşkilâtçılarınıñ sözlerine binayen, olarnıñ maqsadı – «akimiyet ile işbirlikni qurmaq» degil, «akimiyetni insan aqlarınıñ halqara qaidelerge köre qorçalavına» celp etmektir.

Evel Bariyev Qırım.Aqiqatqa şunı bildirgen edi ki, teşkilâtqa aqları bozulğan er bir milletniñ vekilleri muracaat ete bile ekenler. Bu kibi Komitetniñ teşkil etilmesine sebep – insanlarnıñ, ayırıca qırımtatarlarnıñ evlerde keçirilgen tinüvler, yaqalavlar olğan eken.

XS
SM
MD
LG