Link açıqlığı

Lvovda «Qırımtatarlar kimlerdir?» interaktiv lektsiyalarınıñ çerçivesinde nevbetteki subetni keçirecekler. Bu sefer Qırım hanlığı ve onıñ Ukraina ile olğan munasebetleri aqqında tarif etecekler.

Bunı Qırım.Aqiqat saytına tedbir teşkilâtçıları – Krım SOS ve Avropa Şurasınıñ Ukrainadaki ofisi bildirdiler.

«Qırım hanlığı ve Ukraina: taqdir umumiyligi» aqqında belli tarihçı, yazıcı ve alıp barıcı Oleksa Gayvoronskiy añlatacaq.

«O, Qırım hanlığınıñ peyda oluvı, umumiy keçmişniñ kergin vaqiaları ve olarğa kelecekten olğan nazar aqqında tarif etecek, bunıñ ile Qırım ve Ukrainanıñ nevbetteki umumiy tarihı ne vaqıt başlanacaq degen sualge cevap berecek ola»,– dediler teşkilâtçılar.

Lektsiya cumaertesi künü, noyabr 29-da, Kiyev vaqtı boyunca saat 18:30, Mulârska, 2A adresi boyunca İlk Lvov kütüphanesiniñ binasında keçirilecek. Er kes davetli.

Bundan evel, leyha çerçivesinde, Lvovda qırımtatar medeniyeti, muzıka ve adetleri aqqında tarif etken ediler.

Qırım işğalinden soñ tahminen bir buçuq biñ qırımtatarı Lvov vilâyetine köçip keldi. Lektsiyalarnıñ maqsadı – Lvov sakinleri ve şeer musafirlerini qırımtatarlarnıñ medeniyeti, tarihı ve dininen tanış etmek ve medeniyetlerara dialog qurulmasına yardımcı olmaqtır.

XS
SM
MD
LG