Link açıqlığı

Çiygoz: Qurultaynıñ keçirilecek tarihını Türkiye ve Rusiye yolbaşçılarınıñ körüşüvinden soñ belgilermiz


Türkiye qırımtatar milliy Qurultayınıñ toplaşuvını kendi territoriyasında keçirmege izin berdi. Keçirilecek tarihı aqqında malümat dekabrniñ başında olacaq Tükiye ve Rusiye yolbaşçılarınıñ körüşüvinden soñ peyda olur.

Bunı Qırım.Aqiqat saytına qırımtatar milliy Meclis reisiniñ muavini Ahtem Çiygoz bildirdi.

O emindir ki, Qırımdan Qurultayğa kelgen vekillerniñ sayısı çoq olur ve kvorum ile bağlı meseleler yüz bermez.

«Bizni Qırımdan çıqış ve Qırımğa keri qaytuv vaqtında ola bilecek diger şeyler raatsızlata», – dedi Çiygoz.

Bu mesele, Meclis reisiniñ muavini degeni kibi, Türkiye akimiyeti Rusiye yolbaşçılığı ile muzakere etecek ola.

Çiygoznıñ sözlerine köre, Türkiye ve Rusiye yolbaşçılarınıñ körüşüvinden soñra, Meclis Qurultayğa azırlıq körmege devam etecek ve onıñ keçirilecek tarihını bildirir.

Evel qırımtatar milliy yetekçisi Mustafa Cemilev Meclisniñ yañı terkibi saylanılacaq qırımtatar milliy Qurultayınıñ nevbetteki toplaşuvınıñ keçirilmesi İstanbulda ola bilecegi aqqında aytqan edi. Amma bundan soñ qırımtatarlarnıñ bir qısmı yarımadağa kirip olamaycağını tahmin etken edi.

XS
SM
MD
LG