Link açıqlığı

Çiygoz: Türkiye Putinge Cemilev ve Çubarovnıñ Qırımğa kiriş yasaqlığı aqqında sual berecek


Türkiye akimiyeti Rusiye yolbaşçılığı ile Qırımğa qırımtatarlarnıñ yetekçileri – Mustafa Cemilev ve Refat Çubarovnıñ kiriş yasaqlığı aqqında meseleni muzakere etecek ola. Bu sualni Rusiye yetekçisi Vladimir Putinniñ dekabrde olacaq Türkiye Cumhuriyetiniñ ziyareti vaqtında köterecekler.

Bunı Qırım.Aqiqat saytına qırımtatar milliy Meclis reisiniñ muavini Ahtem Çiygoz bildirdi.

Onıñ sözlerine köre, bu mevzu qırımtatar milliy Meclis eyteiniñ Türkiyege yaqında olğan ziyareti vaqtında muzakere etilgen edi.

«Bu mesele üzerinde munaqaşalar keçirildi ve Qırım ile Ukrainanıñ bugünki şaraitlerinde liderlerni tuvğan toprağına kirsetmemek mümkün degil, – dedi Çiygoz. – Bu mesele olar içün (Türkiye içün – muar.) ğayet müimdir».

Onıñ aytqanına köre, bu mesele mıtlaqa Türkiye prezidenti Recep Tayip Erdoğan tarafından Vladimir Putin ile körüşüvinde köterilecek.

«Er alda, bizge bunı vade ettiler», – dedi Çiygoz.

O emindir, bundan soñra Qırımğa qırımtatar milliy liderleriniñ kiriş yasaqlığı çezilir.

«Menimce, qırımtatar milliy yetekçileriniñ kiriş yasağı ile bağlı mesele qapatılır. İşte, buña ümüt besleyim», – dedi Meclis başınıñ muavini.

Bu sene aprel 22 künü Mustafa Cemilevge Rusiye tarafından işğal etilgen Qırımğa kiriş yasağı seslendirildi. Bundan soñra aynı böyle yasaq qırımtatar milliy Meclis reisi Refat Çubarovğa da çıqarıldı.

XS
SM
MD
LG