Türkiye Aqmescitteki Cuma Camisiniñ qurucılığına para bermek niyetini tasdıqladı. Bunı Qırım müftisi acı Emirali Ablayev noyabr 25-te olıp keçken Ankarağa iş ziyareti neticesinde cumaaqşamı künü, noyabr 27-de, bildirdi.
QMDİ matbuat hızmeti bildire ki, Qırım musulmanları müftisi acı Emirali Ablayev Ankarada Türkiye prezidenti Recep Tayip Erdoğan, Türkiye baş naziri Ahmet Davutoğlu, Türkiye tışqı işler naziri Mevlüt Çavuşoğlu ve Din işleri idaresiniñ reisi, professor, doktor Mehmet Görmez ile körüşti.
Taraflar Qırımdaki qırımtatar halqınıñ vaziyetinen bağlı meselelerni muzakere ettiler.
«Körüşüvniñ esas mevzulardan biri Aqmescitte Cuma Cami qurucılığı oldı, Türkiye tarafı işbu leyhağa para berecegini tasdıqladı», – aytıla beyanatta.
Türkiye prezidenti Recep Tayip Erdoğannıñ qayd etkenine köre, «cami mıtlaqa qurulmaq kerek» ve Türkiye, vade etkeni kibi, leyhanı maliye etmeli.
Recep Tayip Erdoğan Cuma Camisi meselesi Rusiye Federatsiyasınıñ prezidenti Vladimir Putin ile körüşüvde baqılacağını bildirdi.
Qırım musulmanları müftisi hacı Emirali Ablayev Din işleri idaresiniñ reisi, professor, doktor Mehmet Görmez ile körüşüvde Qırım Türkiye din ocalarınıñ derslerine muhtac olğanını ayttı.
Türkiye Cumhuriyetiniñ reberleri ile körüşüvlerde qırımtatar halqınıñ lideri Mustafa Cemilev, Qırımtatar Milliy Meclis reisi Refat Çubarov, Meclis reisiniñ muavini Ahtem Çiygoz, Mustafa Cemilevniñ mesleatçısı, Qırımtatar Milliy Qurultayınıñ delegatı Rustem Ümerov, Meclis reisiniñ Türkiye meseleleri boyunca mesleatçısı İsmet Yüksel ile iştirak ettiler.
