Avropa Birligi Ukraina şarqında yüz bergen adise-vaqialardan sebep 13 insannı ve 5 teşkilâtnı «qara cedvelge» kirsetmege razı oldı. Böyle bir qarar Avropa Birliginiñ 28 memleket elçileri tarafından Brüsselde qabul etildi, – dep haber ete Azatlıq Radiosı.
Cedvelde qayd etilgen şahıslarğa Avropa Birligine kiriş yasaq etile, olarnıñ ve teşkilâtlarnıñ esapları blok etilecek.
Reuters agentligi Avropa Birliginde olğan qaynaqlarğa esaslanıp bergen malümatına köre, «Ukraina topraq bütünligini bozmağa tırışqan insanlar cezalandı».
Cezalanğan insanlar Avropa Birliginiñ Resmiy mecuasında noyabr 29-da derc etildi.
Avropa Birligi 119 insannı ve 23 teşkilâtnı cezalap, olarnıñ esaplarını blok etti.
Avropa Birliginiñ tışqı işler nazirler Ukrainada ateş toqtatılğan soñ vaziyet deñişmegenini qayd ettiler.
