Cumaaqşamı künü, noyabr 27-de, Ukraina Yuqarı Radası Ukrainanıñ baş naziri vazifesinde Arseniy Yatsenükniñ namzetine qol tuttı.
Arseniy Yatsenükniñ ükümet reisi vazifesine tayin etmek muracaatı parlament fraktsiyalarınıñ koalitsiyası tarafından prezident Petro Poroşenkoğa berildi. Devlet yolbaşçısı Yuqarı Radağa Arseniy Yatsenükniñ namzetine qol tutmağa rica etken edi. Buña 341 halq deputatı qol tuttı.
«Tarihnı yazmaq qolay degil. Bizim vazifemiz – devletni saqlamaq ve onıñ mustaqilligini isbatlamaqtır. Memlekette cenk, insanlarnıñ başına belâ keldi, ve istilâ toqtatılması bizge bağlı», – dep ayttı Arseniy Yatsenük minberde çıqışta bulunır eken.
Onıñ qayd etkenine köre, Ukraina «Rusiyeniñ arbiy ucumı» qarşısında tura.
Arseniy Yatsenük baş nazir vazifesine tayinlengen soñ er kesni «Ukraina Nazirler Şuraınıñ şekillendirilmesine başlamağa çağırdı.
«2015 senesi 2014-ten daa da qıyın olacaq. Er şey bizim qolumızda. İleri – işke», – dedi o.
Qırım.Aqiqat saytı bildirgeni kibi, Qırım Yuqarı Radasınıñ reisi vazifesine «Petro Poroşenkonıñ Bloku» firqasından halq deputatı Vladimir Groysman saylandı.
Buña 359 halq deputatı qol tuttı.
Beş parlament fraktsiyası «Avropalı Ukraina» parlament koalitsiyasınıñ meydanğa ketirilmesi aqqında añlaştılar. Onıñ erkânına «Petro Poroşenkonıñ Bloku», «Narodnıy front», «Samopomiç» Birleşmesi, Oleg Lâşkonıñ Radikal firqası ve «Batkivşçına» kirdiler. Cumaaqşamı künü, noyabr 27-de, yañı saylanğan parlamentniñ ilk toplaşuvı ötkerilecek.
