Qırımtatar halqınıñ aqlarını qoruv komiteti Qırımda aq bozuvlarını qayd etmek içün «sıcaq ağnı» aça.
Bunı Qırımtatar Milliy Meclis azası, faal ve Komitet koordinatorlarından biri Eskender Bariyev Qırım.Aqiqat saytına bildirdi.
Onıñ aytqanına köre, teşkilât gece-kündüz şikâyetlerni telefon vastasınen qabul etecek.
«Bizde malümat toplamağa yardım etecek mahsus sualler cedveli olacaq. Soñra bu malümat regiondaki vekillerimiz tarafından teşkerilecek, bizde bir ağ olacaqtır. Böyle etip ileride bu malümatnı qullanacaqmız», – dedi Bariyev.
Cuma künü, noyabr 28-de, Moskva vaqtına köre saa 11:00 Aqmescitteki Çehov, 20 adresi boyunca Komitet koordinatorlarınıñ matbuat konferentsiyası ötkerilecek. Olar jurnalistlerni «sıcaq ağ» işi ve maqsadınen tanış etecekler.
Qırımda insanlarnı esir aluv, yaqalav ve apiske aluvlar sıq-sıq yüz bergeninden sebep Qırımtatarlarnıñ aqlarını qoruv Komiteti meydanğa ketirildi. Lâkin onıñ yetekçileri yalıñız qırımtatarlarğa yardım etmeycekler. Komitet eali içün uquq seminarlarını da ötkermege planlaştıra. Teşkilât yardım etecek uquqçılarnı da davet etecek.
