Qırım akimiyeti yarımadada adamlarnı apiske alıp ve yaqalap, Meclis teşkil etken tedbirlerni ziyaret etmek telükeli olğanını kösterecek ola.
Böyle bir fikirni Qırımtatar Milliy Meclis reisiniñ muavini Nariman Celâl mayıs 3-te Ermeni Bazarda qırımtatar halqınıñ lideri Mustafa Cemilevni qarşılav işi boyunca yaqalavlarnı izaatlap bildirdi.
«İlk evelâ, boyle etip insanlarğa bunıñ kibi açıq aktsiyalarda iştirak etmek telükeli olğanını kösterecek olalar, – dep tüşüne o. Ekinciden, bunıñ maqsadı – Meclis ile alâqañız olsa, başıñızğa kelecegiñizni biliñiz, çünki o, sizni imaye etip olamaz, demektir. Yani Meclis teşkil etken tedbirlerde iştirak etmek kendi serbestligiñiz içün telükeli olğanını kösterecek olalar».
Nariman Celâl bildire ki, akimiyet «mayıs 3 işinden» «mümkün olğanı qadar» faydalanacaq.
İşğal etilgen Qırımda dörtünci qırımtatar faali Edem Ebulisov «mayıs 3 işi» boyunca yaqalandı. Noyabr 25-te onı politsiya hadimine qarşı areketlerde qabaatladılar. Eñ yaqın zamanda oña ceza belgileycekler. Oktâbr ayında bu iş çerçivesinde üç insan yaqalanğan edi.
