Link açıqlığı

Aqmescitte mayıs 3-te olıp keçken aktsiya devamında politsiya hadimlerine qarşı yapılğan areketlerde qabaatlanıp yaqalanğan dört qırımtatarından biri Tair Smedlâyevniñ bugünki mahkeme toplaşuvında prokuror onıñ Pravıy sektor ukrain teşkilâtı ile alâqası bar olğanını seslendirdi.

Bunı Tair Smedlâyevniñ adliyecisi Emil Kurbedinov Facebook saifesinde bildirdi.

Onıñ aytqanına köre, Pravıy sektor bunı red etken bir yazma mektübini yolladı. Kurbedinov işbu vesiqanı saifesinde derc etti.

«Prokuror imayem altında bulunğan şahısnıñ Pravıy sektor teşkilâtı ile alâqası bar olğanını ayttı. Bu künleri böyle bir mektüpni aldım. Sözme-söz tercimesi budır – «1962 senesi doğma Smedlâyev Tair İzetoviç, maalesef, Pravıy sektor azası degil», – dep yazdı Kurbedinov.

Tair Smedlâyev oktâbr 22-de Eski Qırımda yolunda yaqalanğan edi.

Smedlâyevniñ maşinasını «politsiya» hadimleri blok ettiler.

Faalni mayıs 3-te Ermeni Bazarda qırımtatar halqınıñ milliy lideri Mustafa Cemilevni qarşılav aktsiyası devamında «politsiya» hadimlerine qarşı yapılğan areketlerde qabaatlaylar.

Qırım alan missiyasınıñ uquq qorçalayıcıları bu iş «siyasiy sımarış» olğanını aytıp, Tair Smedlâyevniñ mahkeme esnasında bir sıra bozuvlarnı qayd ettiler.

Al-azırda Tair Smedlâyev Aqmescit SİZOsında buluna.

XS
SM
MD
LG