Noyabr 26-da işğal etilgen Qırımda Aqmescitniñ Kiyev rayon mahkemesi yaqalanğan Edem Ebulisovnı eki ayğa qadar apiste qaldırmağa qarar aldı. Bunı onıñ aqrabası Qırım.Aqiqat saytına bildirdi.
Qırım.Aqiqat bundan evel bergen malümatqa köre, 1970 doğma Aqmescit sakini noyabr 25-de yaqalandı.
Taqiqat malümatına köre, Ebulisov bu sene mayıs 3-te Ermeni Bazarda qırımtatar halqınıñ lideri Mustafa Cemilevni qarşılarken, Rusiye politsiyasınıñ mahsus bölük hadimini bayraq tayağınen urdı.
Edem Ebulisov mayıs 3-te olıp keçken aktsiyada iştirak etkeninden sebep yaqalanğan dörtünci qırımtatarı oldı.
2014 senesi mayıs 3-te Mustafa Cemilevni Qırımğa kirsetmediler. Bundan sebep qırımtatarlar Ermeni Bazarda «sıñırda» narazılıq aktsiyasını keçirdiler.
Soñra Qırım «prokurorı» Natalya Poklonskaya Meclis reisi Refat Çubarovnı «ekstremistik faaliyeti aqqında tenbiyelep, buña riayet etilmese, Meclis yoq etilecek ve onıñ faaliyeti yasaq etilecek», dep bildirdi. Bundan soñra narazılıq aktsiyasınıñ iştirakçilerine nisbeten mahkemeler ötkerildi, ve para cezası belgilendi.
