Link açıqlığı

Rusiyeniñ Avropa Birliginde daimiy temsilcisi: Qırım akimiyeti ceza alması mümkün


Avropa Birligi Ukrainada üküm sürgen vaziyetten sebep aqımdaki seneniñ soñunda ya da kelecek seneniñ başında qoşma cezalar kirsete bile. Bunı çarşenbe künü, noyabr 26-da, Rusiyeniñ Avropa Birliginde daimiy temsilcisi Vladimir Çijov «Rossiya 24» telekanalınıñ efirinde bildirdi.

Diplomatnıñ aytqanına köre, «Qırımnıñ saylanğan akimiyeti» cezalana bile, – dep haber ete Qırımnıñ öz başına ilân etilgen ükümet «ruporı» Krıminform saytı.

«Cezalar – dialog olmağanınıñ neticesidir. Cezalar qala, olarnıñ belli bir müddeti bar», – dep qayd etti o.

Vladimir Çijovnıñ bildirgenine köre, mart ayında cezalar «ğayrıdan baqıla bile».

Berilgen malümatqa köre, cumaaqşamı künü, noyabr 27-de, Avropa Birliginiñ daimiy temsilciler komiteti öz başına ilân etilgen «DNR» ve «LNR» vekillerini «qara cedvelge» kirsetmek teklifini baqacaq.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG