İşğal etilgen Aqmescitniñ bazı rayonlarında elektrik energiyasını söndürdiler. Bunı şeer sakinleri içtimaiy ağlarda bildireler.
«Moskoltsonı da söndürdiler», – dep yazdı Aqmescitniñ Yuliya adlı sakini.
Qırım.Aqiqat saytınıñ malümatına köre, Keriçniñ bir qaç rayonı da ışıqsız qalğan edi.
Çarşenbe künü, noyabr 26-da, Krımenergo şirketi Qırımnıñ diger şeerlerinde ışıqlar qapatılacağını tahmin etken edi. Şirketniñ matbuat hızmeti bildire ki, energetik küçüniñ qıtlığı sebebinden qazaiy söndürüvler cedveli tizildi.
Şirketniñ matbuat hızmeti bergen malümatına köre, «Ukrenergo» müessisesi Qırımnı energetik ceetten temin etken dört yüksek voltlı ağından ekisini vaqtınca söndürdi.
Aynı vaqıtta, Qırımnıñ öz başına ilân etilgen ükümet «ruporı» Krıminform saytınıñ malümatına köre, Qırım yaqarlıq ve energetika «nazirligi» vaziyetni izaatlamaqtan vazgeçe.
«Nazir» Sergey Yegorov meşğul olğanını aytıp, suallerge cevap bermege istemedi.
«Nazir» muavini Sergey Bedrık da «pek müim körüşüvi» olğanını bildirip, «oña yarın tekrar telefon etmege» rica etti.
Malüm olğanı kibi, noyabr 26-da Ukrenergo şirketi Melitopol-Canköy ve Kahovka-Titan yuqarı voltlı ağlarnı söndürdi.
Ukraina bundan evel de Qırımğa elektrik energiyası berilmesini toqtatqan edi. O vaqıt Qırımnıñ öz başına ilân etilgen baş naziri Sergey Aksönov Ukraina daa bir kere ışıqnı qapatsa, region tolusınen energetikanıñ yedek qaynaqlarına keçecek.
