Link açıqlığı

Saatnıñ esas haberi

Taqiqatnıñ Sudaqta qırımtatarlarnı esir aluv olmağanınıñ delilleri bar, dep bildire Qırım boyunca Rusiye Taqiqat komitetiniñ İdaresi. Bundan sebep taqiqat cinaiy iş açmaycağını bildirdi.

Matbuat hızmetiniñ malümatına köre, 2014 senesi oktâbr 10-da Sudaqnıñ taqiqat bölügi Sudaq şeer meclisiniñ Sudaq-Gruşevka yolunda belgisiz şahıslar bir qaç qırımtatarını alıp ketkenleri aqqında arizasını aldı.

«İşbu vaqia boyunca Qırım Cumhuriyeti boyunca Rusiye Taqiqat komitetit taqiqattan aldın teşkerüvni keçirdi. Onıñ neticelerine köre, qayd etilgen yerde bu müddette cinayetler olmadı. Er kes, cinayet aqqında bildirgenler, em de onıñ şaatları olğanlar sorğuğa çekildi, lâkin olarnıñ malümatları bir-birine teñ kelmedi», – aytıla matbuat hızmetiniñ beyanatında.

Taqiqatnıñ malümatına köre, vaqia yerinde olğan videokameralar cinayet olmağanını tasdıqlay.

Teşkerüv devamında elde etilgen malümat esasında taqiqat cinaiy iş açmamağa qarar aldı, dep bildire matbuat hızmeti.

Rusiyeniñ Qırım işğalinden soñ yarımadada insanlar sıq-sıq ğayıp olıp başladılar. Bunı uquq qorçalayıcı teşkilâtlar da ayta.

İşbu malümat Human Rights Watch halqara uquq qorçalayıcı teşkilâtınıñ soñki maruzasında da mevcut.

Aynı vaqıtta Qırımda «insan aqlarından vekâletli» Lüdmila Lubina bunı yañlış malümat dep adladı. Onıñ aytqanına köre, Qırımnıñ uquq qoruyıcı organlar cedvelinde 800 ğayıp olğan insan bar, olardan yalıñız 18 qırımtatarıdır.

XS
SM
MD
LG