Link açıqlığı

Müfti İsmagilov: Donbass sakinleri ruslarnıñ Ukrainanıñ diger yerlerine ucum eteceklerinden qorqalar


Bütünukrain «Umma» Ukraina musulmanları Diniy idaresiniñ müftisi Said İsmagilov

Donbass sakinleri Rusiye ordusınıñ Ukrainanıñ diger vilâyetlerine arbiy ucum eteceginden qorqalar. Bunı Bütünukrain «Umma» Ukraina musulmanları Diniy idaresiniñ müftisi Said İsmagilov Azatlıq Radiosınıñ mühbiri ile subetinde bildirdi.

«(Ukrainağa – muarrir) er kün Rusiye arbiy tehnikası – tank, top, «Grad», radiolokatsion stantsiyalar – kirmekte. Şimdi o qadar asker ve silâ bar ki, yerli sakinler bile ileri ucum olmasa, bu qadar tehnikağa ne acet bar, dep tüşüneler. Er kes Ukrainanıñ diger vilâyetlerine qarşı ucum olacağını bekleyler», – dedi İsmagilov.

Müftiniñ özü sentâbr ayında Donetskten Kiyevge köçip ketti.

O, emin ki, separatistler zapt etken yerlerde Rusiye ordusı buluna.

Ğarp ve Ukraina Rusiyeni Donbass separatistlerine silâ berüvde qabaatlaylar. Ukraina tışqı işler nazirliginiñ vekili Yevgeniy Perebiynisniñ bildirgenine köre, noyabr 17-23 künleri Ukrainağa eki arbiy kolonna kirdi – birisi Metallist-Sçastye yolu tarafından (6 dane), ekincisi – Stanitsa Luganskaya meken yeri yönelişinde (16 dane).

Moskva Ukraina şarqında cenkleşken separatistlerge alâqası olmağanını bildirmege devam ete. Birleşken milletler teşkilâtınıñ malümatına köre, Ukrainada barışıq ilân etilgen soñ 957 insan elâk oldı. Rusiye tışqı işler nazirligi ise olarnı «aslı olmaycaq» dep adlap, «şübeli qaynaqlar» olğanını ayttı.

XS
SM
MD
LG