Ukraina işğal etilgen territoriyalarından ve ATO zonasından köçip kelgenler maaş, stipendiya ve diger içtimaiy ödevlerni elde etmek içün bu seneniñ soñuna qadar vaqtınca köçip kelgen şahıslarnıñ statusını tasdiqlağan malümat kâğıtlarını almaq kerekler.
«Zerkalo nedeli» bergen malümatına köre, bu kâğıtnı 2014 senesi dekabr 31-ne qadar elde etmek kerek.
«İşbu avaleniñ amelge keçmezden evel belgilengen ödevler, 2014 senesi dekabr 31-ne qadar işbu kâğıtnıñ berilüvi taqdirde, yaşav (bulunuv) yerniñ adresi boyunca tölenilecek», – denile Nazirler kabinetinni noyabr 5 künü qabul etilgen qararında.
Bu avale İçtimaiy siyaset nazirligi, Kiyev devlet memuriyeti ve vilâyet memuriyetlerinden köçip kelgenlerni mezkür kâğıtnıñ berilüv ketişatı aqqında haberdar etmesini talap ete.
Evel qayd etilgeni kibi, Fevqulâde vaziyetler boyunca Ukraina devlet hızmetiniñ malümatına köre, 458 biñ vatandaş Donbassnı terk etti. Böyleliknen, Donbassta vaziyetniñ tınç tertipleşüvi boyunca Ukraina prezidentiniñ vekâletli İrina Geraşçenko aytqanı kibi, er bir yüzünci ukrainalı şimdi köçip kelgen şahıs olaraq sayılmaqta.
