Ukraina tasil ve ilim nazirligi Qırım aliy oquv yurtlarında 2014 senesi berilgen diplomlarnı aliy tasil aqqında devlet nusha diplomlarına deñiştirmege devam ete. Bunı salı künü, noyabr 25-de, Ukraina Tasil ve ilim nazirliginiñ matbuat hızmeti bildirdi.
«Deñiştirüv ketişatı 2014 senesi mayıs 28 künü Ukraina Tasil ve ilim nazirligi tarafından alınğan № 655 ve 2014 senesi iyün 5 künü Ukraina Adliye nazirliginde qayd etilgen № 593/25370 «Aliy tasil aqqında devlet nusha vesiqalarnıñ sımarışı ve Ukrainanınñ vaqtınca işğal etilgen territoriyalarında yerleşken aliy oquv yurtlarınıñ mezunlarına olarnıñ berüv ketişatı aqqında» avalesi ile tasdiqlanılğandır», – dep añlattılar nazirlikniñ matbuat hızmetinde.
Malüm olğanı kibi, şimdi Ukrainanıñ çeşit regionlarında yerleşken qırq doquz universitet, akademiya ve dört köllecde işğal etilgen Qırımdaki aliy oquv yurtlarnıñ 500 mezunınıñ arizaları bar eken.
Böyleliknen, Herson devlet universiteti 71 diplom, Dragomanov adına Milliy pedagogik universiteti – 62, Herson milliy tehnik universiteti – 34 diplomnı berdi.
2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
