Link açıqlığı

Yaqalanğan qırımtatarğa onıñ tarafından «zarar körgen» politsiya hadimi ile körüşüvni teşkil etecekler


Aqmescitte noyabr 25 künü yaqalanğan qırımtatarı Edem Ebulisovqa Rusiye politsiya mahsus bölüginiñ hadimi ile körüşüvni teşkil etecekler. Soñkisi, taqiqatnıñ malümatına köre, qırımtatar milliy yetekçi, Ukraina halq deputatı Mustafa Cemilevniñ Ermeni Bazarda qarşılavı vaqtında Edemniñ tarafından zarar körgen eken.

Bunı öz Facebook saifesinde uquq qorçalayıcı Emil Kürbedinov bildirdi.

«Onı politsiya hadimine qarşı etilgen basımda qabaatlaycaqlar, ğaliba. Taqiqatnıñ fikri – hadimlerni bayraq tayağınen dögdi»,– dedi Kürbedinov.

Yaqalanğannıñ tuvğanları aytqanı kibi, Edem Ebulisov aydavcı olaraq çalışa edi. Onı işniñ yanında yaqaladılar. Bundan soñ evde tintüvni keçirip, mayıs 3 künü Rusiye politsiya hadimlerine urğan bayraqnı tutıp aldılar.

Şimdilik yaqalanğannıñ tuvğanları adliyeciler ile subetleşeler.

Mayıs 3 künü Ermeni Bazarda memuriy sıñırda Mustafa Cemilevniñ qarşılavında iştirak etken daa bir qırımtatarı yaqalandı, dep haber ete adliyeci Emil Kürbedinov.

2014 senesi mayıs 3-de Mustafa Cemilevni Qırımğa kirsetmediler. Bu sebepten qırımtatarlar Ermeni Bazarnıñ «sıñırı»nda numayışnı keçirgen ediler.

Birazdan Qırım «prokurorı» Natalya Poklonskaya Meclis reisi Refat Çubarovğa «ekstremist faaliyetiniñ yasaq olğanı» aqqında tenbiyeni seslendirgen edi. Aks alda Meclisniñ yoq etilecegini de bildirdi. Bundan soñra numayış iştirakçilerine qarşı mahkeme toplaşuvları keçirildi ve neticede insanlarğa para cezalarını belgilediler.

XS
SM
MD
LG