Mayıs 3 künü Ermeni Bazarda memuriy sıñırda Mustafa Cemilevniñ qarşılavında iştirak etken daa bir qırımtatarı yaqalandı, dep haber ete adliyeci Emil Kürbedinov.
Onıñ malümatına köre, kene de «politsiya hadimine etilgen basım» kibi qabaat çıqarılacaq.
«Mayıs 3 künü» (Cemilevniñ qarşılavı) işi boyunca daa bir qırımtatarnıñ yaqalanuvı aqqında haber keldi. Politsiya hadimine nisbeten etilgen basım kibi qabaat olacaqtır, menimce. Taqiqatnıñ fikri – bayraq tayağınen hadimlerni ura edi»,– dep yazdı Kürbedinov öz Facebook saifesinde.
Qırımda bu iş boyunca soñki yaqalanğan insan – Qurultaynıñ Merkeziy Saylav komissiya reisi Zair Smedlâyevniñ qardaşı Tair Smedlâyev edi. Faalni Eski Qırımda oktâbr 22 künü yaqaladılar. Şimdilik o SİZOda buluna.
2014 senesi mayıs 3-de Mustafa Cemilevni Qırımğa kirsetmediler. Bu sebepten qırımtatarlar Ermeni Bazarnıñ «sıñırı»nda numayışnı keçirgen ediler.
Birazdan Qırım «prokurorı» Natalya Poklonskaya Meclis reisi Refat Çubarovğa «ekstremist faaliyetiniñ yasaq olğanı» aqqında tenbiyeni seslendirgen edi. Aks alda Meclisniñ yoq etilecegini de bildirdi. Bundan soñra numayış iştirakçilerine qarşı mahkeme toplaşuvları keçirildi ve neticede insanlarğa para cezalarını belgilediler.
