Rusiye rok-çalğıcısı Andrey Makareviç Rusiye prezidenti Vladimir Putinniñ Qırım ve Donbassta etken areketleri olmağan olsa, Ukrainada vaziyet bam-başqa olacağı aqqında bildire.
Bunı o Forbes Kazakhstan gazetasına ayttı.
«Putin Qırım ile yañlışmasa ve biz Donbassqa kirişmese edik, bugün Ukraina vaziyeti bam-bamşqa olur edi. Memleket diger bir inkişaf yolunı seçmege istese, onıñ aqqıdır. Memleketniñ bizim ile olmasını istesek, Ukraina kirmege ıntılğan Avropağa köre daa zengin ve celp etici olmalımız. Tanklar vastası ile slav dünyanı quramazsıñ – yalıñız slav cenkni. Çıqışsız bir yoldır», – dey Makareviç.
Onıñ fikrine köre, Rusiye Donbassta separatistlerni desteklemege toqtasa, bir aftadan soñra bu cenk de biter.
Makareviç Qırım işğali ve Donbass vaziyeti ile bağlı Rusiye areketlerini tenqitke oğratqan rusiyeli artsitlerden biri oldı.
2014 senesi mart ayında Rusiye tarafından etilgen Qırımnıñ işğalinden soñra Andrey Makareviç defalarca Rusiye jurnalist ve siyasetçileri tarafından taqip etildi. Hususan, Donetsk vilâyetinde qaçaqlarnıñ ögünde çıqış etkeninden soñra, çalğıcınıñ bir sıra kontsertleri nasıldır bir sebeplerden lâğu etile.
