Qırımtatarlarnıñ milliy lideri Mustafa Cemilev ve qırımtatar milliy Meclis reisi Refat Çubarov aqşam, noyabr 24 künü, Türkiye prezidenti Recep Tayip Erdoğan ile körüşmek içün Kiyevden Türkiyege yol aldılar. Bunıñ ile Türkiye baş naziri Ahmet Davutoğlu ile körüşüv de nazarda tutıla, dep haber ete QHA agentligi.
Mustafa Cemilevniñ aytqanı kibi, işbu apansız ziyaret çerçivesinde qırımtatar halqınıñ temsilcileri Türkiye yetekçileri ile Qırımda qırımtatarlarnıñ vaziyeti aqqında söz yürsetecekler.
Şu cümleden, qırımtatarlarnıñ yaşayış şaraitlerini ögrenmek içün Qırımğa Türkiyeden resmiy olmağan eyyetniñ yollanılacağı da muzakere etilecek.
Cemilevniñ sözlerine köre, işbu ziyaret bir kün devam etecek.
Noyabr 10 künü Kiyevde jurnalistlerge Türkiye çetel işler naziri Mevlüt Çavuşoğlu Türkiye Qırım tamır halqınıñ yaşayış şaraitlerini ögrenmek maqsadı ile yarımadağa resmiy olmağan eyyetni yollay bilecegi aqqında aytqan edi.
İşğal etilgen Qırımda ayırım ve repressiyalar aqqında ukrain ve halqara uquq qoruyıcı teşkilâtlar ep aytmaqta. Ukraina çetel işler nazirliginde bu vaziyetni «ekinci sürgünlik» olaraq adladılar. Mında eminler ki, Qırımda repressiyalarnıñ ögüni almaq vazifede yalıñız halqara toplulığı yardımcı ola bile.
