Ukraina prezidenti Petro Poroşenko bildire ki, memleketniñ NATO erkânına kirmesi umumukrain referendumda qabul etilecek. Bunı o, Litvaniya prezidenti Dalâ Gribauskayte ile beraber keçirgen matbuat konferentsiyasında bildirdi, dep haber ete Azatlıq Radiosı.
«NATO erkânına kirmek ya da kirmemek – kesen-kes ukrain halqınıñ qararıdır», – dep qayd etti Poroşenko.
Onıñ aytqanına köre, Ukraina NATO talaplarına riayet etmege başlasa, ukrain halqı NATO erkânına kirmek ya da kirmemek qararını qabul etecek.
NATO alyansnıñ mevamı deñişmegenini er daim tasdıqlay: Kiyev istese ve kerekli şartlarğa riayet etse, Ukraina alyansqa kirmek aqqını qazanacaq.
Aynı zamanda Rusiye «Ukrainanıñ NATO erkânına kirmeyceginiñ kefillerini» talap ete.
