Almaniya sakinleriniñ 39% Qırımnıñ Rusiye terkibinde qalmasına qol tuta. Bunı ARD alman telekanalınıñ muracaatınen Infratest dimap institutı keçirgen içtimaiy tedqiq neticeleri köstere, dep haber ete Deutsche Welle.
Sorav neticelerine köre, FRG sakinleriniñ 48% Qırımnıñ Rusiye qısmı olaraq tanılmasına qarşı çıqa, 54% Putinniñ siyasetinde telüke köreler.
Sorav «Gunter Yauh» yayınınıñ sımarışınen noyabr 19-20 künleri keçirildi. Tedqiq devamında Almaniyanıñ 14 yaşını toldurğan 1000 sakinine sual berildi.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
