Cuma künü, noyabr 21-de, Ankaradaki Qırımtatar medeniyet ve yardımlaşma Derneginde «Qırımtatar şiir ve edebiyat» aqşamları yañıdan başladı. Tedbirde qırımtatar edebiyat tarihınıñ çeşit devirleri aqqında malümat berildi, em de olarğa ait olğan şiirler oquldı.
Dernekniñ Gençlik komissiyası tarafından teşkil etilgen merasimge Ankarada bulunğan Qırımtatar Milliy Meclis reisi Refat Çubarov da qoşuldı.
Meclis reisi Refat Çubarov çıqışta bulunır eken, Qırımda olıp keçken soñki vaqialar ve Ukraina ve diger memleketlerniñ işğal etilgen Qırımnıñ Ukrainağa keri qaytarılmasınen bağlı yapqanları aqqında söz yürsetti. Bunıñnen beraber, Refat Çubarov bu künleri Ankarada ükümet vekilleri ile mezkür mevzularda körüşüvler ötkerilecegini ayttı.
Qayd etmeli ki, Ankaradaki Qırım dernegi bunıñ kibi şiir ve edebiyat aqşamlarını yıl boyunca ayda bir kere cuma künleri teşkil etmege planlaştıra.
