İşğal etilgen Aqmescitte Yevromaydan yıllığında, noyabr 21-de, İtibar ve Azatlıq Kününde, qırımlılar Taras Şevçenko abidesine çeçeklerni ketirdiler, amma soñra belgisiz vandallar güldestelerni dağıtıp aldılar.
Qırım.Aqiqat saytınıñ mühibirine aqmescitliler añlatqanı kibi, kündüz abide yanında daa da çoq güldeste bar edi. Aytqanlarına binayen, Ukraina tuğrası şeklinde ve bayrağı tüsünde yapılğan qanser gülçemberi ayırı diqqatnı celp ete edi, birazdan bu güldeste de vandallarnıñ tarafından dağıtıldı.
Şaatlarnıñ aytqanı kibi, belgisiz şahıslar Taras Şevçenko abidesi yanında nizamsızlıqnı teşkil etkenler.
Etrafta yürgen Aqmescitniñ yaşlı sakini bunı «insanlar degil de, aydutlar» yapqanını bildirdi.
Noyabr 21-de Ukraina İtibar ve Azatlıq Kününi qayd ete. Kiyevde ve memleketniñ diger şeerlerinde 2013 noyabr – 2014 fevral aylarında kütleviy narazılıq numayışlarda elâk olğanlarnıñ hatırasına bağışlanğan tedbirler keçirile.
Noyabr 21 künü Kiyevniñ merkezinde Yevromaydannıñ başlanmasına temel qoyğan kütleviy narazılıq mitingniñ keçirilmesine bir yıl tola. Qırım sakinleri de özlerini Maydanda em tınç mitinglerde, em de ciddiy qarşılıqlarda faal alıp bardılar.
