Kiyevde noyabr 21-de, cuma künü, Maydan iştirakçileri tarafından İtibar İnqilâbınıñ yıllığına bağışlanğan İtibar marşı keçirile.
Azatlıq Radiosı bergen malümatqa köre, marş iştirakçileri kollonalarğa tizilip: Mihaylovska meydanı – Taras Şevçenko abidesi – Bessarabka – Maydan – İnstitutska – Mariinskıy bağçası – Gruşevskiy soqağı – Yevropeyskaya meydanı marşrutı boyunca ketmekte.
Noyabr 21-de Ukraina İtibar ve Azatlıq Kününi qayd ete. Kiyevde ve memleketniñ diger şeerlerinde 2013 noyabr – 2014 fevral aylarında kütleviy narazılıq numayışlarda elâk olğanlarnıñ hatırasına bağışlanğan tedbirler keçirile.
Noyabr 21 künü Kiyevniñ merkezinde Yevromaydannıñ başlanmasına temel qoyğan kütleviy narazılıq mitingniñ keçirilmesine bir yıl tola. Qırım sakinleri de özlerini Maydanda em tınç mitinglerde, em de ciddiy qarşılıqlarda faal alıp bardılar.
