Qırımnı ukrain siyasetinden boşatmaq siyasiy bir vaqiadır, ötmekten bile müimdir, dep bildirdi jurnalistlerge noyabr 21 künü ukrain yol işaretleriniñ yoq etilüvi vaqtında Qırım «Devlet şurası» başı Vladimir Konstantinov.
«Bizler içün siyasiy ceetten bu pek müim adisedir. Ötmekten bile müimdir – ukrain faşizmge çevirilgen bütün suniy ukrain hususiyetlerden boşanmalımız», – dedi o.
Ukrain tilinde olğan yol işaretlerini «spiker» «aqaret» olaraq adladı.
«Qırımlılar bir sıra sınavlardan keçtiler, olardan birisi – 23 yıl devamında milliy azlıq olğanımızınıñ añlamı. Nice yıllar devamında aşalavnı yaşadıq. Bizim içün bu ğayet müim tarihiy bir derstir»,– dedi Konstantinov ve mütenasip yol işaretlerniñ qırımtatar şekilini qırımtatarlarnıñ toplu yaşağan yerlerde pekitmege söz berdi.
Yol işaretlerniñ deñişüvi boyunca işlerni, «Devlet şurası» başınıñ aytqanı kibi, yılnıñ soñuna qadar bitirecek olalar.
Noyabr 21 künü işğal etilgen Qırımda yol işaretlerini deñiştirmege başladılar. Kefe yolundan başladılar, mında ukrain tilinde olğan «Trudove – Urojayne» işaretini «Trudovoye – Urojaynoye» soyuna deñiştirdiler.
