Noyabr 21-de Ukraina İtibar ve Azatlıq Kününi qayd ete.
Kiyevde ve memleketniñ diger şeerlerinde 2013 noyabr – 2014 fevral aylarında kütleviy narazılıq numayışlarda elâk olğanlarnıñ hatırasına bağışlanğan tedbirler keçirilecek, dep haber ete Azatlıq Radiosı.
Umumtasil mekteplerde İtibar dersleri, Yevromaydan iştirakçileri ile körüşüvler ve Nebesnaya Sotnâ Qaramanlarınıñ hatırasına bağışlanğan dersler keçirilecek.
Paytahtnıñ merkezinde nizam üç binden ziyade militsiya hadimi tarafından nezaret etilecek, dep haber ete Kiyevde Ukraina İçki İşler Nazirliginiñ Baş idaresiniñ matbuat hızmeti.
İtibar ve Azatlıq Kününi noyabr 13 künü Ukraina prezidenti Petro Poroşenko öz avalesi ile belgiledi.
Noyabr 21 künü Kiyevniñ merkezinde Yevromaydannıñ başlanmasına temel qoyğan kütleviy narazılıq mitingniñ keçirilmesine bir yıl tola. Qırım sakinleri de özlerini Maydanda em tınç mitinglerde, em de ciddiy qarşılıqlarda faal alıp bardılar.
