Qırımnıñ öz başına ilân etilgen baş naziri Sergey Aksönov bildirdi ki, Qırım akimiyeti milliy azlıqlar meseleleri boyunca OSCE yuqarı komissarı Astrid Torsnıñ yarımadağa kirmesine keder etmeycek. Bunı o, cumaaqşamı künü, noyabr 20-de TASS agentligine bildirdi.
Bundan evel OSCE Daimiy şurasınıñ toplaşuvında Astrid Tors Qırım akimiyetinden yarımadağa kirmek içün ruhset soradı.
«Men al-azırda regionnı nezaret etken akimiyetni menim Qırım yarımadasını ziyaret etmek mevzusında muracaatına acele sürette cevap bermesine çağıram», – dedi o.
Tors OSCE memleketleriniñ temsilcilerine regionda qırımtatar ve ukrain ealisine qarşı basqı quvetleşkenini bildirdi.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalar kirsetti. Ğarp Qırım Ukrainağa bağlı olğanını tekrarlamağa devam ete.
