Aqmescit – Resmiy statistikağa köre, pasportlarnı yarımadanıñ aman-aman episi sakinleri elde ettiler. Amma, pasport berilgen merkezlerde nevbetler eksilmey.
Daa eki ay evelsi Rusiyeniñ Federal migratsion hızmetiniñ yerli idaresi reisi Pötr Yaroş esabat berip, Qırım sakinleriniñ 98% Rusiye Federatsiyasınıñ pasportlarını elde etti, degen edi.
«98% – acayip bir raqam. Kimdir daa işanmağan şahıslar, 2 %, keçici müddetniñ yani dekabrniñ soñuna qadar pasportlarnı elde etecekler. Er şey yahşı olacaq», – dep ayttı FMH-niñ vekili.
Amma, Qırımnıñ migratsion hızmet bölüklerinde eksilmegen nevbetler bu raqamnı şübe altına qoya. Qırım sakinleriniñ ekseriyeti tek şimdi rus pasportlarını almaq içün vesiqalarnı endi tapşırıp başladılar.
«Men aşıqmay edim, şamata keçsin, dedim o vaqıt nevbetlerde turmamaq içün barırım dedim. Mında ise, ale daa iç bir şey yatışmadı, – dep şikâyet ete Aqmescitniñ Merkeziy rayon pasport merkezinde bulunğan orta yaşlı erkek. – Başta, nevbette turıp, vesiqalarnı bermek kerek, soñra, kene de nevbette turıp pasportnı almaq mümkün».
Adamlar öz nevbetni beklep, aman-aman soqaqta turalar. İhtiyar adamlarğa daa ağır kele. Bir qaç saat nevbette bulunalar. Umumiy nevbette balalarnen turğan qadınlar da bar. Binağa kirişni demir qapular ve atik yigitler qapatalar. Olar, adamlarnı birer-birer içerige vesiqalarnı teslim etmek içün yibereler, ve bir qaç adamnı vesiqalarnı almaq içün kirgizeler. Azbarda bir grupp adamlarnıñ ukrain pasportlarını toplap, binağa kireler. Bir vaqıttan soñ, haberlernen qaytalar.
«Yaramay haberler, – dey yaş yigit. – Pasportlar azır degil…» Bundan soñ, soy adlarnı oqup başlay.
«Nasıl azır degil, ya? – dep çorlana nefaqacı. – Eki buçuq ay evelsi vesiqalarnı tapşırğan edim!»
«Daa ne qadar beklemek mümkün! – dep qıçıra qadın. – Men endi üçünci kere kelip, nevbetlerde turam, pasport ise, azır degil».
Neticede bir qaç adam qala. Pasportları azır olğan «çastlı» binağa kireler, amma kene de ümütsizlikke qapılalar.
«Soy adımnı hatanen yazğanlar, – dey qadın. – Endi er şeyni başından başlamaq kerek. İşte ise, sigortanı talap eteler. Onı pasportsız yapıp olamamız».
«Oğlumnı yazmağanlar, – dep ayta erkek. – Ne apayımnıñ, ne menim pasportımda. Biz küçük balanen mında yarım kün turdıq. Endi onı da pasportqa yazdırmaq içün kene de kelip, nevbette turmaq kerek».
«Bir saatte pasport» leyhası muvafaqiyetsiz oldı
Rusiyeli pasportlarda bir çoq hata yapılğanı içün Qırım «yolbaşçısı» Sergey Aksönov migratsion hızmetiniñ hadimlerini para cöremelernen qorquzdı.
«Yazıq ki, hadimler yahşı mütehassıslar degille, aylıqları ufaq, onıñ içün hatalar yapalar, – dep añlattı o. – Men Qırım sakinlerinden bu kibi iş içün afu sorayım».
Noyabr 1 kününe qadar Qırım akimiyeti FHH organlarına nevbetlerni de yoq etmege işandırğan ediler. Amma, bunı ale daa yapıp olamaylar. «Bir saatte pasport» leyhası Qırımda muvafaqiyetsiz oldı.
Adamlar ta gece turıp, pasportlarnı tez vaqıt içinde resmiyleştirmege isteyler, ammaisteklerine irişip olamaylar. Bir saat içinde pasportnı bermek yerine adamlarnı bir aftadan nevbetke yazalar.
