Link açıqlığı

Cumaaqşamı künü, noyabr 20-de, Qırımdaki Yaltinskaya soqağında qurulacaq Büyük Cuma Cuma yerini temizlediler. Aktsiyağa gençlik ve cemaat teşkilâtları qoşuldılar.

​Qırım musulmanları müftisi Hacı Emirali Ablayev, onıñ muavini Ayder İsmailov ve qırımtatar cemaatı aktsiyada iştirak ettiler.

Aktsiya devamında çöplük toplanıldı, 4 sene evelsi ketirilgen taşlar da sıñır boyu tizildi.

Qırım musulmanları müftisi Hacı Emirali Ablayev işbu leyha üzerinde iş 10 yıldan berli devam etkenini qayd etti.

«Bu leyha üzerinde topraq ayırılğan kününen itibaren 10 yıl devamında çalışamız, Türkiye qurucılıqqa para berecek edi, ve bundan vazgeçmey. Qırımnıñ şimdiki vaziyeti halqnı raatsız etmemek kerek, çünki siyaset mında kirişmey. Eñ yaqın zamanda biler devlet organlarınıñ ruhsetini alacaqmız, ve Allahnıñ emiri ile cami qurulmağa başlaycaq. Maddiy yardım aqqında bizler yalıñız Türkiye ile qonuşqan edik, lâkin yardım etecek birisi olsa, biz qarşı degilmiz», – dep ayttı Emirali Ablayev.

Hatırlatamız, Qırım «Devlet şurasınıñ» reis muavini Remzi İlyasov Büyük Cuma Cami qurucılığı meselesine Rusiye prezidenti Vladimir Putin de kirişe bilecegini aytqan edi. Mezkür mesele Rusiye ve Türkiye prezidentleri Vladimir Putin ve Recep Tayip Erdoğannıñ körüşüvinde muzakere etile bile.

Hatırlatamız, 2011 senesi baş nazir vazifesinde Vasiliy Cartı olğan vaqıtta Aqmescitteki Yaltinskaya, 22 adresi boyunca Büyük Cuma-Caminiñ temel taşı qoyuldı. Bundan evel bir sıra mahkeme davaları olğan edi. Soñra caminiñ maketi tasdıqlandı.

XS
SM
MD
LG