Noyabr 24-te Kiyevde qırımtatar halqınıñ lideri Mustafa Cemilev işğal etilgen Qırım ve Ukraina şarqından köçip kelgen insanlarnen körüşecek. Tedbir teşkilâtçıları Qırım.Aqiqat saytına bergen malümatlarına köre, Mustafa Cemilev ömür yolunı tarif etecek ve köçip kelgenler içün ğayet aktual olğan mevzularnı laf etecek.
Körüşüvde vatandaşlarınıñ aq-uquqları ve serbestligi, olarnı bozuv meselesi, şu cümleden işğal etilgen yarımadada, muzakere etilecek. Körüşüv noyabr 24-te, saat 19:00 «Kozatskiy» musafirhanesinde ötkerilecek.
Bundan ğayrı, tedbirde «Memleket içinde köçip kelgen insanlarnıñ aq-uqukları ve serbestligini temin etüv aqqında» Ukraina qanunınıñ emiyeti baqılacaq. Malüm ki, mezkür qanun oktâbr 20-de Ukraina Yuqarı Radası tarafından qabul olunıp, noyabr 19-da prezident tarafından imzalanjı.
«Kendi halqınıñ Vatanına, Qırımğa, qaytuv oğrunda küreş içün Mustafa Cemilev 15 yıl devamında sovet lagerleri ve apishanelerinde qaldı. O, dünyada eñ uzun olğan 306 künlik açlıqqa dayandı. Uquq qorçalayıcı faaliyeti içün nice mukâfatqa nail oldı. Bu sene onı dünyanıñ Nobel mukâfatına namzet kösterdiler», – dep qayd ettiler «Krım SOS» teşkilâtında.
İştirak etecek olğanlarğa evelden qayd olmağa rica etildi.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalar kirsetti. Ğarp Qırım Ukrainağa bağlı olğanını tekrarlamağa devam ete.
