Link açıqlığı

Rusiye Fevqulâde vaziyetler nazirligi Donbassqa sekizinci «gumanitar konvoynı» yollaycaq ola, dep haber ete Rusiye fevqulâde vaziyetler nazir muavini Vladimir Artamonov.

«Şimdi nevbetteki konvoy şekillendirile. Bizler kolonna noyabr 26-27 künleri ketecegine ümüt etemiz», – dep qayd etti o.

Artamonovnıñ aytqanına köre, yükniñ tahminen 40% – yaqarlıq.

Rusiye yedi kere belli olmağan bir yükni Donbassqa yollap, onı «gumanitar konvoy» olaraq adlandırdı. Ukraina tarafınıñ buña razılığı olmadı, Qızıl Haç Halqara komitetiniñ temsilcileri de nezaret etmediler.

Noyabr 16-da Rusiyeniñ yedinci «gumanitar konvoyı» Rusiye Ukraina sıñırından keçti.

Oktâbr 31-de ve noyabr 2-de, Rusiye eki yükni yolladı. Em Ukraina, em de dünya Rusiyeniñ işbu areketlerini sert bir şekilde tenqid ettiler.

RNBO malümatına köre, Rusiyeden kelgen altıncı «gumanitar yardımda» Ukrainada cenkleşecek insanlarnı azırlamaq içün çeşit-türlü donatma ve trenajörlar bar edi.

RNBO bildirgenine köre, Rusiye yük maşinaları Rusiyege keri qaytar eken, ukrain zavodlarından arbiy donatmalarnı çıqara ediler. Aynı bu naqliyat vastalarında da Ukrainada öldürilgen Rusiye askerlerini alıp ketken ediler.

XS
SM
MD
LG